2Cor 12 | KhmKCB | STEP | ខ្ញុំ ត្រូវតែ អួត ទោះបី គ្មាន ប្រយោជន៍ ក៏ដោយ ប៉ុន្ដែ ខ្ញុំនឹងបន្ដអួត អំពី និមិត្ដ និង ការ បើក សំដែង របស់ ព្រះអម្ចាស់

2 Corinthians 12

1 ខ្ញុំត្រូវតែអួតទោះបីគ្មានប្រយោជន៍ក៏ដោយប៉ុន្ដែខ្ញុំនឹងបន្ដអួតអំពីនិមិត្ដនិងការបើកសំដែងរបស់ព្រះអម្ចាស់ 2 ខ្ញុំស្គាល់មនុស្សម្នាក់នៅក្នុងព្រះគ្រិស្ដដែលកាលពីដប់បួនឆ្នាំមុនត្រូវបានឆក់យកទៅស្ថានសួគ៌ទីបី(ទោះបីគាត់ទៅទាំងនៅក្នុងរូបកាយឬក្រៅរូបកាយនោះខ្ញុំមិនដឹងទេប៉ុន្ដែព្រះជាម្ចាស់ជ្រាប) 3 ហើយខ្ញុំដឹងទៀតថាមនុស្សបែបនេះ(ទោះបីគាត់ទៅទាំងនៅក្នុងរូបកាយឬក្រៅរូបកាយនោះខ្ញុំមិនដឹងទេប៉ុន្ដែព្រះជាម្ចាស់ជ្រាប) 4 ត្រូវបានឆក់យកទៅស្ថានសួគ៌ហើយបានឮពាក្យដែលមិនអាចបរិយាយបានក៏មិនអនុញ្ញាតឲ្យមនុស្សនិយាយឡើយ។ 5 ខ្ញុំនឹងអួតអំពីមនុស្សបែបនេះប៉ុន្ដែចំពោះខ្លួនខ្ញុំខ្ញុំមិនអួតទេលើកលែងតែអំពីភាពកម្សោយរបស់ខ្ញុំ 6 ព្រោះទោះបីខ្ញុំចង់អួតក៏ខ្ញុំមិនមែនជាមនុស្សល្ងង់ដែរដ្បិតខ្ញុំនិយាយសេចក្ដីពិតប៉ុន្ដែខ្ញុំចៀសទៅចុះក្រែងលោមានអ្នកណាម្នាក់វាយតម្លៃខ្ញុំលើសពីអ្វីដែលគេបានឃើញឬបានឮអំពីខ្ញុំ 7 និងដោយព្រោះភាពឧត្ដុង្គឧត្ដមនៃការបើកសំដែងនេះ។ដូច្នេះហើយដើម្បីកុំឲ្យខ្ញុំលើកតម្កើងខ្លួនពេកទើបខ្ញុំទទួលបានបន្លាមួយនៅក្នុងសាច់របស់ខ្ញុំជាទេវតារបស់អារក្សសាតាំងដែលវាយខ្ញុំគឺដើម្បីកុំឲ្យខ្ញុំលើកតម្កើងខ្លួនពេក។ 8 ចំពោះសេចក្ដីនេះខ្ញុំបានសូមអង្វរព្រះអម្ចាស់បីដងមកហើយដើម្បីដកវាចេញពីខ្ញុំ 9 ប៉ុន្ដែព្រះអង្គមានបន្ទូលមកខ្ញុំថា៖ «គុណរបស់យើងល្មមដល់អ្នកហើយដ្បិតចេស្ដារបស់យើងនឹងសម្រេចនៅក្នុងភាពកម្សោយ»។ ដូច្នេះហើយខ្ញុំនឹងអួតអំពីភាពកម្សោយរបស់ខ្ញុំដោយអំណរបំផុតដើម្បីឲ្យព្រះចេស្ដារបស់ព្រះគ្រិស្ដបានសណ្ឋិតលើខ្ញុំ 10 ហេតុនេះហើយដោយព្រោះព្រះគ្រិស្ដខ្ញុំពេញចិត្ដនឹងភាពកម្សោយការត្មះតិះដៀលការលំបាកការបៀតបៀនព្រមទាំងសេចក្ដីទុក្ខព្រួយដ្បិតពេលណាខ្ញុំខ្សោយពេលនោះខ្ញុំរឹងមាំ។ 11 ខ្ញុំបានត្រលប់ជាមនុស្សល្ងង់ដោយសារអ្នករាល់គ្នាបង្ខំខ្ញុំតាមពិតខ្ញុំគួរទទួលបានការលើកតម្កើងពីអ្នករាល់គ្នាព្រោះទោះបីខ្ញុំមិនមែនជាអ្វីក៏ដោយក៏ខ្ញុំគ្មានអ្វីចាញ់ពួកកំពូលសាវកទាំងនោះដែរ។ 12 មានទីសំគាល់ច្បាស់អំពីមុខងារជាសាវករបស់ខ្ញុំដែលបានបង្ហាញនៅក្នុងចំណោមអ្នករាល់គ្នាតាមរយៈការអត់ធ្មត់គ្រប់បែបយ៉ាងតាមរយៈទីសំគាល់ព្រមទាំងការអស្ចារ្យនិងកិច្ចការដ៏មានអំណាចទាំងឡាយ។ 13 តើអ្នករាល់គ្នាមានអ្វីអន់ជាងក្រុមជំនុំផ្សេងទៀតក្រៅពីការដែលខ្លួនខ្ញុំមិនមែនជាបន្ទុកដល់អ្នករាល់គ្នានោះ? សូមលើកលែងទោសឲ្យខ្ញុំចំពោះកំហុសនេះផង។ 14 មើល៍ខ្ញុំត្រៀមមកជួបអ្នករាល់គ្នាជាលើកទីបីហើយប៉ុន្ដែខ្ញុំក៏មិនធ្វើជាបន្ទុកដែរដ្បិតខ្ញុំមិនចង់បានអ្វីជារបស់អ្នករាល់គ្នាឡើយគឺចង់បានអ្នករាល់គ្នាវិញព្រោះមិនមែនកូនៗទេដែលត្រូវសន្សំអ្វីទុកឲ្យឪពុកម្ដាយគឺឪពុកម្ដាយទេដែលត្រូវសន្សំទុកឲ្យកូនៗវិញ។ 15 រីឯខ្ញុំវិញដើម្បីព្រលឹងរបស់អ្នករាល់គ្នាខ្ញុំនឹងចំណាយទ្រព្យដោយអំណរបំផុតសូម្បីតែត្រូវចំណាយខ្លួនខ្ញុំឲ្យអស់ក្ដីបើខ្ញុំស្រលាញ់អ្នករាល់គ្នាកាន់តែខ្លាំងឡើងៗតើអ្នករាល់គ្នាស្រលាញ់ខ្ញុំកាន់តែតិចទៅៗឬ? 16 ខ្ញុំមិនមែនជាបន្ទុកដល់អ្នករាល់គ្នាទេក៏ដោយប៉ុន្ដែគេថាខ្ញុំជាមនុស្សមានល្បិចបោកប្រាសយកពីអ្នករាល់គ្នា 17 តើខ្ញុំបានបោកប្រាស់អ្នករាល់គ្នាតាមរយៈអ្នកណាម្នាក់ដែលខ្ញុំបានចាត់ឲ្យមកឯអ្នករាល់គ្នាដែរឬអត់? 18 ខ្ញុំបានលើកទឹកចិត្ដលោកទីតុសនិងបានចាត់បងប្អូនម្នាក់ឲ្យមកជាមួយគ្នាតើលោកទីតុសបានបោកប្រាស់អ្នករាល់គ្នាដែរឬអត់? តើយើងមិនបានដើរតាមវិញ្ញាណតែមួយនិងតាមលំអានតែមួយទេឬ? 19 អ្នករាល់គ្នាស្មានជារហូតមកថាយើងដោះសានឹងអ្នករាល់គ្នាប៉ុន្តែយើងនិយាយនៅក្នុងព្រះគ្រិស្ដនៅចំពោះព្រះជាម្ចាស់វិញបងប្អូនជាទីស្រឡាញ់អើយ! សេចក្ដីទាំងអស់នោះគឺសម្រាប់ស្អាងចិត្ដអ្នករាល់គ្នាទេ។ 20 ដ្បិតខ្ញុំខ្លាចក្រែងលោពេលខ្ញុំមកដល់ខ្ញុំឃើញថាអ្នករាល់គ្នាមិនដូចជាអ្វីដែលខ្ញុំប៉ងរីឯអ្នករាល់គ្នាក៏ឃើញថាខ្ញុំមិនដូចជាអ្វីដែលអ្នករាល់គ្នាប៉ងដែរឬក្រែងលោមានការឈ្លោះប្រកែកការឈ្នានីសកំហឹងការប្រជែងការនិយាយបង្ខូចការបរិហារកេរ្តិ៍ការក្រអឺតក្រទមនិងសេចក្ដីវឹកវរ 21 ឬក្រែងលោពេលខ្ញុំមកម្ដងទៀតនោះព្រះជាម្ចាស់របស់ខ្ញុំនឹងបន្ទាបខ្ញុំនៅចំពោះមុខអ្នករាល់គ្នាហើយខ្ញុំត្រូវកើតទុក្ខចំពោះមនុស្សជាច្រើនដែលបានប្រព្រឹត្ដបាបពីមុនប៉ុន្ដែមិនប្រែចិត្ដពីសេចក្ដីស្មោកគ្រោកអំពើអសីលធម៌ខាងផ្លូវភេទនិងអំពើល្មោភកាមដែលគេបានប្រព្រឹត្ដ។